Programa de simultaneidade do Grao en Administración e Dirección de Empresas e o Grao en Dereito

Ao finalizar este programas, os estudantes converteranse en profesionais cunha dupla formación:

• Por unha parte, serán capaces de desempeñar labores de xestión, asesoramento e avaliación nas organizacións empresariais tanto na área xurídica como na área empresarial. Concretamente, estarán en condicións de manexaren os conceptos e técnicas empregados nas diferentes áreas funcionais da empresa, así como de xestionaren as relacións que existen entre elas e os obxectivos xerais da organización (proceso de quebra, concurso de acredores, fusións, adquisicións, transmisión e xestión de patrimonios...).
• Por outra parte, serán capaces, cun perfil eminentemente xurídico e un coñecemento global de todas as áreas relacionadas co mundo do dereito, de lideraren o desenvolvemento de proxectos e se adaptaren de forma eficiente a un ámbito de rápida evolución.

De igual maneira, adquírese un coñecemento teórico e práctico do noso sistema xurídico, tanto de ámbito nacional como autonómico e o europeo, alén de se aprender a argumentar e a manexar as ferramentas básicas para actuar nos tribunais, nos despachos de avogados, administracións públicas etc.

Podes obter máis información premendo aquí.

Entre outras, as competencias xenéricas que se adquiren co Grao en Dereito son as seguintes:

• Desenvolverse para o exercicio dunha cidadanía aberta, culta, crítica, comprometida, democrática e solidaria, capaz de analizar a realidade, diagnosticar problemas e formular e implantar solucións baseadas no coñecemento e orientadas ao ben común.
• Valorar críticamente o coñecemento, a tecnoloxía e a información dispoñible para resolver os problemas que deben enfrontarse.
• Valorar a importancia que ten a investigación, a innovación e o desenvolvemento tecnolóxico no avance socioeconómico e cultural da sociedade.

Entre outras, as competencias xenéricas que se adquiren co Grao en ADE son as seguintes:

• Saber identificar e anticipar oportunidades, asignar recursos, organizar a información, seleccionar e motivar as personas, tomar decisións en condicións de incerteza, acadar os obxectivos propostos e avaliar resultados.
• Ser capaz de tomar decisións e, en xeral, asumir tarefas directivas.
• Manexar os conceptos e técnicas empregados nas diferentes áreas funcionais da empresa, así como entender as relacións que existen entre elas e os obxectivos xerais da organización.

Entre outras, as competencias específicas que se adquiren co Grao en Dereito son as seguintes:

• Coñecemento das principais institucións xurídicas.
• Coñecemento dos principios e valores constitucionais.
• Coñecemento das estruturas xurídico-políticas de ámbito nacional e internacional.
• Capacidade de interpretar e analizar críticamente o ordenamento xurídico.
• Capacidade de comprender e de redactar documentos xurídicos.
• Manexo da oratoria xurídica.

Entre outras, as competencias específicas que se adquiren co Grao en ADE son as seguintes:

• Xestionar e administrar unha empresa ou organización de pequeno tamaño, entendendo a súa posición competitiva e institucional e identificando as súas fortalezas e debilidades.
• Integrarse en calquera área funcional dunha empresa ou organización mediana ou grande e desempeñar con soltura calquera labor de xestión nela encomendada.
• Valorar a partir dos rexistros relevantes de información a situación e previsible evolución dunha empresa.

Entre outras, as competencias transversais que se adquiren co Grao en Dereito son as seguintes:

• Resolver problemas de forma efectiva, valorando a importancia que ten a investigación, a innovación e o desenvolvemento tecnolóxico no avance socioeconómico e cultural da sociedade.
• Traballar de forma colaborativa.
• Comportarse con ética e responsabilidade social como cidadáns e profesionais.

Entre outras, as competencias transversais que se adquiren co Grao en ADE son as seguintes:

• Entender a importancia da cultura emprendedora e coñecer os medios ao alcance das persoas emprendedoras
• Asumir como profesionais e cidadáns a importancia da aprendizaxe ao longo da vida.
• Valorar criticamente o coñecemento, a tecnoloxía e a información dispoñible para resolver os problemas que deben enfrontarse.

O título de graduado/a en Dereito fornece unha formación teórica e práctica no noso sistema xurídico, tanto de ámbito nacional como autonómico e europeo. Os graduados serán capaces de comprender o funcionamento do sistema xurídico, saberán argumentar en dereito e coñecerán as ferramentas básicas para actuar nos tribunais.

Os graduados en ADE deberán manexar os conceptos e técnicas empregados nas diferentes áreas funcionais da empresa, así como entender as relacións que existen entre elas e os obxectivos xerais da organización. Así mesmo, están capacitados para tomar decisións e asumir tarefas directivas.

Do punto de vista da inserción laboral, os graduados en Dereito contan cunhas perspectivas altas de accederen a un emprego, pois a versatilidade dos estudos posibilita que desempeñen unha actividade xurídica tanto no campo privado como no público.

Alén disto, as características socioeconómicas da cidade da Coruña e a súa área metropolitana inclúen un importante desenvolvemento dos sectores de servizos e industria, que precisan de profesionais do ámbito xurídico. Doutra banda, na cidade ten a súa sede o máximo órgano xudicial da Comunidade Autónoma, o Tribunal Superior de Xustiza de Galicia, a Audiencia Provincial e un importante número de xulgados, isto, ademais da Delegación do Goberno en Galicia e un bo número de organismos autonómicos, o que determina unha gran demanda de postos na administración pública.

Polo que respecta á iniciativa privada, son especialmente significativas as empresas dedicadas ao mundo da banca e o sector téxtil, todas elas cunha clara necesidade de contar con gabinetes ou servizos xurídicos.

Os graduados en ADE poden acadar postos de traballo como directivos con responsabilidades (de tipo medio ou alta dirección) nun contexto económico e empresarial caracterizado pola súa crecente complexidade e dinamismo. Os procesos de globalización económica, coas súas repercusións no ámbito da internacionalización das empresas, determinarán o contorno de traballo destes titulados.

As principais saídas profesionais son as seguintes:

• Avogado/a (exercicio libre da profesión ou avogado/a do Estado)
• Xuíz/a
• Fiscal
• Notario/a
• Profesor/a de universidade
• Procurador/a dos tribunais
• Asesor/a fiscal
• Axente de cambio e bolsa
• Rexistrador/a da propiedade inmobiliaria
• Corpo diplomático
• Secretario/a de concellos
• Corpos da Administración da Unión Europea e organismos internacionais, do Estado, das comunidades autónomas e da Administración local
• Asesoría xurídica, fiscal e laboral de empresas privadas

Ademais, como graduados en ADE poden desempeñar postos directivos nas áreas de contabilidade, márketing-comercialización, vendas, finanzas, loxística, recursos humanos, organización, estratexia, dirección, sistemas de información etc. A modo de exemplo, cítanse os seguintes perfís:

• Directivo/a empresarial de nivel medio
• Alta dirección
• Analista empresarial
• Consultoría
• Auditoría
• Administración pública
• Autoemprego, emprendedorismo
• Analista de mercados
• Exercicio profesional libre
• Ensino universitario, ESO, FP e bacharelato

Como graduados en Dereito e como graduados en ADE, ao finalizaren os estudos da simultaneidade os alumnos poden cursar os mestrados universitarios que se imparten nas dúas facultades (dos oito mestrados poden citarse por exemplo os relativos á banca e as finanzas; o asesoramento xurídico empresarial; a dirección e administración de empresas e a avogacía).

Posteriormente, tamén poderán acceder aos programas de doutoramento impartidos nestes centros para realizar a tese de doutoramento.

As principais empresas e institucións que colaboran coa Facultade de Dereito e a Facultade de Economía e Empresa son as seguintes:

• Inditex
• La Voz de Galicia
• Veira y Vilariño Abogados
• Nova Galicia Banco
• Giráldez y Garrido Abogados, SC
• Caamaño, Concheiro & Seoane, Abogados y Asesores de Empresa
• Avogacía Gabinete de Estudos Xurídicos
• Dobarro y Sanesteban Abogados
• Galileo Networks Consultoría
• Grupo Clave Servicios
• GADISA
• Decathlon
• Einsa Print
• GT Motive Einsa SAU
• FREMAP, Mutua de Accidentes de Trabajo
• Avogacía do Estado
• Consello Galego da Competencia
• Asesoría Xurídica do Servizo Galego de Saúde (SERGAS
• Autoridade Portuaria
• Centro de Extensión Universitaria e Divulgación Ambiental de Galicia (CEIDA)
• Centro de Inserción Social Carmela Arias y Díaz de Rábago
• Centro de Reeducación de Menores Concepción Arenal
• Decanato de Registradores de la Propiedad, Mercantiles y Bienes Inmuebles de Galicia
• Delegación del Gobierno en Galicia
• Deputación da Coruña
• Ilustre Colegio Notarial de Galicia
• Tribunal Superior de Xustiza de Galicia, Audiencia Provincial e xulgados da Coruña
• Concello da Coruña

O Programa de simultaneidade terá unha duración de once cuadrimestres. O número de créditos necesario para superar o programa é de 396 ECTS, distribuídos da forma que se indica no Anexo I da Normativa específica para a simultaneidade do Grao en ADE e o Grao en Dereito.

Na fase final dos plans de estudos deste programa, unha vez superados cando menos un total de 288 créditos, incluídos todos os dos tres primeiros cursos, realizarase o Traballo de Fin de Grao (12 créditos ECTS), en que serán de aplicación os coñecementos adquiridos en cursos anteriores.

Canto ao centro responsable das xestións administrativas do Duplo Grao ADE-Dereito: co fin de facilitar as distintas xestións administrativas relacionadas co expediente académico dos estudantes, acordouse designar a Facultade de Dereito como centro responsable da súa tramitación e custodia, sen prexuízo do disposto no artigo 12 da normativa para o procedemento de expedición de títulos oficiais.

No referente á impartición do ensino, este terá lugar cada cuadrimestre de forma alterna no centro que corresponder segundo as materias que se foren impartir.

O detalle do plan de estudos está na seguinte ligazón.

Estrutura do estudo

Os estudos de grao organízanse por cursos. Fai clic nun curso para obter máis información.

• 1º Curso
• 2º Curso
• 3º Curso
• 4º Curso
• 5º Curso
• 6º Curso

 BOE co plan de estudos (PDF)

A posta en marcha e o plan de estudos do Grao en Dereito obtivo o informe favorable de toda unha serie de axentes externos, en concreto da Fiscalía de Galicia, o Decanato de Rexistradores de Galicia, a Academia Galega de Administración Pública, o Colexio Notarial de Galicia e o Colexio de Procuradores de Galicia.

Profesorado

O ensino do plan de estudos está a cargo de docentes dos departamentos de: Ciencias da Computación e Tecnoloxías da Información, Dereito Privado, Dereito Público, Economía, Empresa, Letras, Matemáticas e Socioloxía e Ciencias da Comunicación.

Os estudos de grao organízanse por cursos. Fai clic nun curso para obter máis información.

• 1º Curso
• 2º Curso
• 3º Curso
• 4º Curso
• 5º Curso
• 6º Curso

Accións para a mobilidade do estudantado

A UDC mantén convenios de mobilidade de estudantes con universidades e institucións de educación superior de catro continentes. Cada curso académico publícanse varias convocatorias de mobilidade de estudantes para que estes poidan cursar parte dos seus estudos nunha desas institucións (un semestre ou un ano académico completo), obtendo pleno recoñecemento académico ao seu regreso no expediente UDC do estudante.

Nesas convocatorias publícanse as prazas das que a UDC dispón para ofrecer aos estudantes dos distintos centros e, no seu caso, as condicións específicas de cada unha delas. Do mesmo xeito, todos os anos convócanse bolsas para financiar a realización de prácticas no estranxeiro por parte dos estudantes

As prácticas serán tamén recoñecidas como parte do seu expediente académico ou no suplemento europeo ao título. O estudante é libre para buscar a empresa ou institución de destino do EEES na que desexa facer as prácticas. A estes efectos, a UDC ten un taboleiro virtual no que se publican as ofertas que chegan ao seu coñecemento.

As convocatorias de mobilidade xestiónanse conxuntamente nos centros de procedencia dos estudantes, baixo a dirección dos Responsables de Relacións Internacionais dos centros, e na Oficina de Relacións Internacionais da Universidade (ORI). Os requisitos xerais para acceder a unha praza de mobilidade, os dereitos e obrigacións dos estudantes, así como o procedemento para conceder as prazas regúlanse no Regulamento de Mobilidade da UDC.

Accións concretas do centro

a) Programa Erasmus.

Os estudantes teñen a posibilidade de ampliaren os seus estudos en universidades de Alemaña, Bélxica, Italia, Portugal, Francia, Romanía, Eslovenia, Lituania, Malta, a República Checa, Polonia e Turquía.

b) Programa SICUE-Séneca.

É un sistema de mobilidade destinado a aqueles alumnos que desexen realizar un curso académico noutra universidade española. Inclúe o programa de intercambio SICUE e a convocatoria de bolsas Séneca.

c) Así mesmo, a Universidade da Coruña dispón dun programa de intercambio de estudantes no marco de convenios bilaterais con outras universidades de países estranxeiros como o Brasil, Chile, Costa Rica, Cuba, Uruguai, México, Arxentina, os Estados Unidos e o Reino Unido.