Programa Oficial de Doutoramento en Estatística e Investigación Operativa

O ámbito científico-tecnolóxico no que se forma o estudantado do PDEIO, e no cal se realizan as súas teses doutorais, organízase en dúas grandes liñas de investigación: Estatística e Ciencia de Datos (EST) e Investigación Operativa: Optimización e Teoría de Xogos (IO). Trátase de liñas de grande importancia para o desenvolvemento non só de ciencia básica, senón de gran transversalidade, toda vez que novas contribucións nestas liñas son relevantes para o avance doutras disciplinas como a biomedicina, a economía, a enxeñaría, a informática, as ciencias ambientais e, máis recentemente, as humanidades dixitais e a intelixencia artificial. Esta transversalidade ten reflexo na alta empregabilidade dos egresados do PDEIO, non só no ámbito académico, senón tamén en diferentes sectores do ámbito privado, como poden ser as finanzas, a enerxía ou a consultoría. O PDEIO pretende dotar de formación sólida (en EST e IO) aos seus estudantes, formando profesionais con nivel competencial MECES 4, capaces de adaptarse ás necesidades e demandas dos grandes retos globais en diversos ámbitos da sociedade. Unha proba adicional do perfil transversal subxacente ás liñas de investigación do PDEIO vén dada polo carácter interdisciplinar de moitas das teses que se desenvolven no programa. Cabe salientar que o contexto no que se forma o estudantado do PDEIO é notablemente activo en investigación, como se pode ver na organización dos grupos de investigación implicados no programa. De maneira singular, arredor do PDEIO tamén hai unha importante actividade de transferencia ao sector produtivo, canalizada principalmente a través do Centro de Investigación e Tecnoloxía Matemática de Galicia (CITMAga, https://citmaga.gal/es/home) e o Centro de Investigación en Tecnoloxías da Información e Comunicacións (CITIC, https://citic.udc.es/), o que permite ao alumnado do programa colaborar activamente en proxectos de transferencia, obtendo así un valioso complemento na súa formación doutoral e, en ocasións, podendo conformar tamén unha parte relevante da tesis doutoral.